Tetori, i njohur si muaji i letërsisë, këtë vit përkon me 115-vjetorin e lindjes së Millosh Gjergj Nikollës – Migjeni, një prej figurave më të rëndësishme të letërsisë shqipe. Në Bibliotekën Publike “Marin Barleti” në Shkodër, një ekspozitë përkujtimore prezanton botime, dokumente dhe dëshmi që lidhen me jetën dhe krijimtarinë e tij, duke rikthyer në vëmendje trashëgiminë që Migjeni la pas.
Por 115 vjet pas lindjes së tij, përtej kujtesës dhe homazheve, shtrohet edhe një pyetje tjetër: sa lexohet dhe sa kuptohet sot Migjeni, veçanërisht nga brezat e rinj? Në bibliotekë thonë se interesi për veprën e tij vazhdon të jetë i pranishëm edhe te të rinjtë, të cilët kërkojnë botime dhe materiale që lidhen me autorin.
Për ta afruar edhe më shumë Migjenin me publikun e ri, biblioteka ka parashikuar një sërë aktivitetesh përgjatë muajit tetor. Klubi rinor “Bibliomania” do ta ketë Migjenin në fokus të takimeve të tij, ndërsa programi përfshin homazhe pranë bustit të shkrimtarit dhe një performancë letrare të mbështetur në krijimtarinë e tij.
Në këtë mënyrë, 115-vjetori synon të mos mbetet vetëm një përkujtim formal, por një përpjekje për ta rikthyer Migjenin në lexim, diskutim dhe interpretim nga një brez i ri. Më shumë se një shekull pas lindjes së tij, sfida mbetet që vepra e Migjenit të mos ruhet vetëm në fondet e bibliotekave, por të vazhdojë të komunikojë me lexuesin e sotëm.