Klubi i Futbollit Vllaznia ka reaguar pas barazimit 1-1 në transfertë ndaj AF Elbasanit, duke shprehur shqetësime për organizimin e ndeshjes, sjelljen e personave të pranishëm në tribunën VIP dhe standardin e arbitrimit.

Përmes një deklarate për shtyp, klubi shkodran thekson se, pavarësisht se takimi në “Elbasan Arena” duhej të zhvillohej pa spektatorë për shkak të një vendimi disiplinor, në tribunën VIP kishte persona që, sipas Vllaznisë, fyen dhe provokuan gjatë gjithë ndeshjes lojtarët dhe përfaqësuesit kuqeblu. Klubi pretendon se përballë kësaj situate mungoi reagimi i personave përgjegjës për organizimin dhe sigurinë.

Një tjetër pikë e fortë e reagimit lidhet me arbitrimin. Vllaznia kërkon të analizohet veçanërisht episodi i minutës së 34-t, kur skuadra shkodrane kryesonte 1-0 dhe lojtari i Elbasanit, Abas, ndërhyri ndaj Mehmetajt. Sipas klubit kuqeblu, ndërhyrja ishte e rëndë dhe episodi duhej të ishte shqyrtuar plotësisht përmes sistemit VAR.

Në deklaratë përmenden gjithashtu dy golat e anuluar të Vllaznisë në minutat shtesë, në 90+2 dhe 90+6. Klubi kërkon që episodet vendimtare të ndeshjes të shqyrtohen me profesionalizëm dhe transparencë nga strukturat përgjegjëse të arbitrimit.

Vllaznia thekson se nuk kërkon privilegje apo favorizim, por një gjykim të drejtë, standard të njëjtë për të gjitha skuadrat dhe respektim rigoroz të rregullave.

Klubi shkodran paralajmëron se do të vijojë të mbrojë interesat e tij përmes rrugëve institucionale, ndërsa njëkohësisht distancohet nga çdo formë dhune apo fyerjeje dhe bën thirrje që të ruhet fryma e fair-play-t në futbollin shqiptar.

Deklarata e plotë e KF Vllaznia

DEKLARATË PËR SHTYP

Klubi i Futbollit Vllaznia, pas përfundimit të ndeshjes AF Elbasani – KF Vllaznia, zhvilluar sot në stadiumin “Elbasan Arena” dhe përfunduar me rezultatin 1–1, e konsideron të domosdoshme të bëjë publik shqetësimin e tij për disa episode dhe rrethana që ndikuan negativisht në klimën sportive dhe mbarëvajtjen e kësaj ndeshjeje.

Së pari, pavarësisht se ndeshja, në zbatim të vendimit të organeve disiplinore, duhej të zhvillohej pa praninë e spektatorëve, në tribunën VIP ishin të pranishëm persona të cilët, gjatë gjithë ndeshjes, fyen dhe provokuan vazhdimisht lojtarët dhe përfaqësuesit e KF Vllaznia.

Përballë kësaj situate, Klubi ynë konstatoi mungesën e reagimit të nevojshëm nga personat përgjegjës për organizimin, mbarëvajtjen dhe sigurinë e ndeshjes. Një situatë e tillë është e papranueshme, veçanërisht në një takim që, sipas vendimit disiplinor, duhej të zhvillohej pa publik. Së dyti, po aq shqetësues për KF Vllaznia është edhe standardi i arbitrimit të ndeshjes.

Në mënyrë të veçantë kërkojmë që të analizohet me seriozitet episodi i minutës së 34-t, kur, në momentin që Vllaznia kryesonte 1–0, lojtari i Elbasanit Abas kreu një ndërhyrje jashtëzakonisht të rëndë ndaj futbollistit tonë Mehmetaj.

Sipas vlerësimit të Klubit, ndërhyrja rrezikoi seriozisht shëndetin dhe karrierën e lojtarit tonë dhe, minimalisht, meritonte një shqyrtim të plotë përmes sistemit VAR. Mungesa e një reagimi proporcional ndaj një episodi të tillë ndikoi drejtpërdrejt në tensionin e krijuar në fushën e lojës dhe cenoi besimin e lojtarëve dhe stafit tonë ndaj standardit të arbitrimit.

Në këtë kontekst, edhe dy golat e anuluar të KF Vllaznia në minutat shtesë, përkatësisht në 90+2 dhe 90+6, e bëjnë edhe më të domosdoshme që të gjitha episodet vendimtare të kësaj ndeshjeje të shqyrtohen me profesionalizëm dhe transparencë të plotë nga strukturat përgjegjëse të arbitrimit.

KF Vllaznia nuk kërkon privilegje dhe nuk kërkon favorizim.
Kërkojmë vetëm atë që duhet t’i garantohet çdo klubi dhe çdo skuadre që hyn në fushën e lojës: gjykim të drejtë, standard të njëjtë për të gjithë, respektim rigoroz të rregullave dhe kushte që mbrojnë integritetin e garës.

Ne besojmë se episode të tilla, nëse nuk analizohen dhe adresohen me përgjegjësi nga institucionet përkatëse, dëmtojnë besimin te gara, cenojnë frymën e fair-play-t dhe krijojnë tensione që nuk i shërbejnë futbollit shqiptar.

KF Vllaznia do të vazhdojë të mbrojë me vendosmëri investimin, punën dhe interesat e Klubit, duke kërkuar me forcë respektimin e të drejtave tona vetëm në rrugë institucionale.
Në të njëjtën kohë, Klubi distancohet qartësisht nga çdo formë dhune, fyerjeje apo reagimi që bie ndesh me vlerat e sportit dhe u bën thirrje të gjithë aktorëve të futbollit të kontribuojnë për një garë të drejtë, të respektueshme dhe të denjë.

KF VLLAZNIA