Më shumë se katër shekuj pasi në Tophanë u ngrit xhamia e parë, kjo lagje e Shkodrës ka sërish një objekt të ri kulti. Xhamia e re e Tophanës u përurua këtë të premte, në një ceremoni ku morën pjesë drejtues të komunitetit mysliman dhe besimtarë.
Historia e këtij objekti kulti nis në shtator të vitit 1617, kur xhamia e parë e Tophanës u ndërtua nga bamirësi Mustafa Efendi. Më shumë se 400 vite më vonë, kjo traditë vijon me xhaminë e re, projekti i së cilës u mundësua nga organizata “Qatar Charity”.
Për besimtarët e pranishëm foli Myftiu i Shkodrës, Muhamed Sytari, i cili vlerësoi rëndësinë e këtij momenti për komunitetin dhe vazhdimësinë e traditës fetare në Tophanë.
Në ceremoninë e përurimit ishte i pranishëm edhe Kryetari i Komunitetit Mysliman të Shqipërisë, Haxhi Bujar Spahiu, i cili iu drejtua besimtarëve me një mesazh me rastin e hapjes së xhamisë së re.
Xhamia e re ofron ambiente bashkëkohore për kryerjen e riteve fetare dhe aktivitetet e komunitetit. Me përurimin e saj, Tophana rikthen një objekt të rëndësishëm të jetës fetare, duke vijuar një histori që në këtë lagje të Shkodrës ka nisur më shumë se katër shekuj më parë.