Alpet shqiptare vijojnë të jenë një nga destinacionet më të kërkuara nga turistët vendas dhe veçanërisht nga ata të huaj gjatë sezonit veror. Peizazhet natyrore, shtigjet malore dhe mundësitë për aventura po e bëjnë këtë zonë një nga pikat më të vizituara të turizmit në vend.
Thethi, Valbona dhe Lumi i Shalës mbeten destinacionet më të preferuara, ndërsa kalimi malor Theth–Valbonë vazhdon të konsiderohet një nga itineraret më të bukura për ecje në Ballkan. Përveç tij, vizitorët zgjedhin edhe shtigje të tjera që lidhin Shqipërinë me Kosovën dhe Malin e Zi.
Një tjetër atraksion i rëndësishëm është lundrimi në liqenet e Komanit dhe Fierzës, i cili u ofron turistëve mundësinë të shijojnë nga afër peizazhet spektakolare të Alpeve.
Operatorët turistikë theksojnë se interesi për turizmin malor vijon të rritet nga viti në vit, falë natyrës së paprekur, shtigjeve të mirënjohura dhe eksperiencave të larmishme që ofrojnë Alpet shqiptare për çdo vizitor.