Në Gjuraj të Planit u zhvillua aktiviteti i përvitshëm “Pulti kujton dhe promovon – Festa e Qereshit 2026”, një veprimtari që ndërthur kujtesën historike me promovimin e traditave, natyrës dhe produkteve vendase.
Festa organizohet çdo 15 korrik që prej vitit 1940. Kjo datë lidhet me përkujtimin e Luftës së Planit të vitit 1915, kur banorët e zonës u përballën me pushtuesit serbo-malazezë. Gjatë aktivitetit u nderuan dëshmorët e Planit, Dukagjinit, Qafë Thanës dhe figura të tjera që sakrifikuan jetën për lirinë e krahinës.
Të pranishmit vendosën kurora pranë Memorialit të Dëshmorëve dhe mbajtën fjalime për rëndësinë e ruajtjes së kujtesës historike. Këtë vit programi ishte më i reduktuar, në shenjë solidariteti me familjen e një banori të zonës që humbi jetën pak ditë më parë.
Aktiviteti synoi gjithashtu promovimin e Pultit si një zonë me vlera të mëdha historike, kulturore dhe natyrore. Krahina njihet për pyjet e gështenjave, lumin Kir, shpellat, shtigjet malore, produktet tradicionale dhe mikpritjen e banorëve.
Pavarësisht potencialit turistik, Pulti vijon të përballet me probleme në infrastrukturën rrugore, shëndetësi dhe arsim. Banorët dhe emigrantët kanë kontribuar ndër vite për përmirësimin e zonës, përfshirë ndërtimin e rrugës drejt Gjurajve dhe restaurimin e kishës së Planit.
Festa e Qereshit u organizua me mbështetjen e Bashkisë Shkodër, banorëve, emigrantëve dhe familjeve kontribuuese të zonës, me synimin për të ruajtur traditat dhe për ta bërë Pultin më të njohur për vizitorët.