Shkodra pritet të hyjë në një fazë të re zhvillimi pas miratimit në Parlament të kredisë për projektin strategjik “Porta e Alpeve”, një program me vlerë 100 milionë euro i financuar nga Banka Evropiane e Investimeve dhe Qeveria Shqiptare.

Kryetari i Bashkisë Shkodër, Benet Beci, e cilësoi këtë projekt si një hap të madh drejt transformimit ekonomik, urban dhe turistik të Shkodrës dhe gjithë veriut të vendit. Sipas tij, pas një pune përgatitore që ka nisur që në fund të vitit 2023, në bashkëpunim me Fondin Shqiptar të Zhvillimit dhe ekspertë vendas e ndërkombëtarë, është ndërtuar një paketë investimesh që synon të ndryshojë mënyrën e jetesës dhe zhvillimit në rajon.

Ndër projektet kryesore që do të financohen përmes “Portës së Alpeve” janë transformimi i bulevardit kryesor të Shkodrës në një korridor të gjelbër dhe multimodal, përfundimi i korridorit rrugor Shkodër–Velipojë, modernizimi i transportit urban me 17 autobusë elektrikë, krijimi i një rrjeti biçikletash mbi 80 kilometra, si dhe zhvillimi i një sistemi të integruar muzeor për qytetin.

Programi parashikon gjithashtu investime në parkime publike, zgjerimin e lidhjeve turistike dhe forcimin e identitetit kulturor të Shkodrës, me synimin për ta kthyer qytetin në një qendër moderne evropiane dhe një destinacion turistik gjatë gjithë vitit.

Postimi i plotë i kryebashkiakut Benet Beci

Sot në Parlament do të miratohet kredia për projektin “Porta e Alpeve”, një nga programet më të rëndësishme strategjike për transformimin e Shkodrës dhe veriut të Shqipërisë, me financim nga Banka Evropiane e Investimeve dhe Qeveria Shqiptare. Ky program prej 100 milion eurosh përfaqëson një hap të madh përpara në vizionin tonë për ta kthyer Shkodrën në një rajon me zhvillim ekonomik të qëndrueshëm, turizëm në të gjitha stinët e vitit dhe standarde urbane evropiane. Pas një periudhe të gjatë përgatitore, nisur që në dhjetor 2023, dhe me një punë shumë profesionale, Bashkia e Shkodrës, në bashkëpunim me Fondin Shqiptar të Zhvillimit, ekspertë ndërkombëtarë dhe vendas, ka arritur të ndërtojë një paketë projektesh transformuese që do ta ndryshojnë mënyrën si lëvizim, jetojmë dhe zhvillojmë ekonominë dhe turizmin në rajonin tonë.
Ndër projektet kryesore që do të financohen janë:
🔹 Transformimi i bulevardit kryesor të Shkodrës (Sheshi Demokracia-Rrethrrotullimi I bypass) në një korridor të gjelbër dhe multimodal, me më shumë hapësira për këmbësorët, biçikletat, transportin publik dhe gjelbërimin urban, duke lidhur qendrën historike të qytetit me parkun e ri në hyrje, liqenin dhe zonat rekreative.
🔹 Përfundimi i korridorit rrugor Shkodër–Velipojë, me standarde moderne dhe anashkalim të qendrave të banuara, duke krijuar një lidhje më të shpejtë dhe më të sigurt me bregdetin dhe duke forcuar lidhjet rajonale drejt Shëngjinit, në perspektivë me Ulqinin.
🔹 Modernizimi i transportit urban me 17 autobusë elektrikë, zgjerim të linjave në qytet dhe lidhje të dedikuara me Shirokën, Zogajn dhe Kalanë e Rozafës, si një alternativë moderne dhe e qëndrueshme ndaj përdorimit të automjeteve private.
🔹 Krijimi i një rruge unike biçikletash prej mbi 80 kilometrash, që lidh liqenin e Shkodrës, lumin Buna dhe Velipojën me qytetin dhe me itinerare të tjera drejt Alpeve dhe Nënshkodrës, duke krijuar një produkt të ri turistik dhe rekreativ për të gjithë rajonin.
🔹 Zhvillimi i Sistemit të Muzeve të Shkodrës, ku muzeumet, itineraret urbane dhe hapësirat publike lidhen në një rrjet të integruar kulturor dhe turistik, duke e kthyer qytetin në një “muze të hapur” dhe duke forcuar identitetin kulturor të Shkodrës. Do të kemi muzeun e qytetit, muzeun dhe galerinë e arteve dhe një muze historik te Shtëpia e Oso Kukës të rinovuar,  duke vënë siç duhet në pah trashëgiminë tonë të pasur turistike.
🔹 Investime të tjera në parkime publike për të përmirësuar organizimin urban, aksesin dhe menaxhimin e trafikut në qytet dhe zonat turistike.
Këto projekte përfaqësojnë brezin e ri të investimeve strategjike për Shkodrën. Së bashku me investimet madhore që po realizohen aktualisht, ato do të kontribuojnë në transformimin e qytetit tonë në një qendër moderne evropiane.
Shkodra ka hyrë në një fazë të re zhvillimi.
Dua të falënderoj Qeverinë Shqiptare dhe Kryeministrin  Edi Rama për mbështetjen dhe vëmendjen ndaj Shkodrës, si edhe Fondin Shqiptar të Zhvillimit, ekspertët vendas dhe ndërkombëtarë, që kanë bashkëpunuar përgjatë gjithë kësaj periudhe për ta çuar përpara këtë vizion zhvillimi.