Aksioni për çlirimin e hapësirave publike të zaptuara prej vitesh në Shkodër po vijon me ndërhyrje konkrete në disa zona të qytetit, me fokus rikthimin e tyre në funksion të komunitetit dhe nxënësve të shkollave.

Ndërhyrja më e fundit është zhvilluar pranë gjimnazit “28 Nëntori”, ku është prishur struktura e jashtme e subjektit “Pizzeri Italia”. Sipas autoriteteve, puna do të vijojë me hapjen dhe sistemimin e plotë të hapësirës përreth, duke krijuar kushte më të sigurta dhe funksionale për nxënësit dhe banorët e zonës.

Kryetari i Bashkisë Shkodër, Benet Beci, ka zhvilluar edhe një takim me pronarin e biznesit, Mirsad Berdica, duke vlerësuar mirëkuptimin dhe bashkëpunimin e treguar për lirimin e hapësirës publike.

Ky rast konsiderohet një shembull pozitiv i bashkëpunimit mes institucioneve dhe biznesit, duke treguar se rikthimi i hapësirave publike mund të realizohet përmes dialogut dhe përgjegjësisë së përbashkët.