Teatri “Migjeni” i Shkodrës ka shënuar një tjetër sukses në skenën kombëtare. Shfaqja “Gomerët e Trojeve”, e prezantuar në Festivalin Ndërkombëtar të Komedisë “KoKo Fest” në Korçë, është vlerësuar me tre çmime.
Në përfundim të festivalit, juria ka vlerësuar Altea Lazajn me çmimin “Artistja e re më e mirë”, ndërsa Ina Morinaj është shpallur “Aktorja më e mirë joprotagoniste”. Një tjetër vlerësim i rëndësishëm ka shkuar për Gent Bejkon, i cili ka fituar çmimin për “Regjinë më të mirë”.
Tre çmimet kurorëzojnë pjesëmarrjen e trupës shkodrane në “KoKo Fest”, ku Teatri “Migjeni” u përfaqësua me komedinë “Gomerët e Trojeve”.
Pas shpalljes së çmimeve, Teatri “Migjeni” e ka cilësuar rezultatin një sukses të jashtëzakonshëm, duke shprehur krenarinë për vlerësimet që, sipas institucionit, nderojnë jo vetëm teatrin, por edhe Shkodrën.
Teatri ka falënderuar gjithashtu artistët, stafin dhe bashkëpunëtorët që kontribuuan në realizimin e projektit, duke e konsideruar suksesin rezultat të punës së përbashkët.
Tre çmimet e fituara në Korçë e rikthejnë Teatrin “Migjeni” nga “KoKo Fest” me një bilanc të rëndësishëm artistik dhe me një tjetër vlerësim për trupën shkodrane në skenën teatrore shqiptare.
