Mbi 27 mijë vizitorë në Kalanë e Rozafës vetëm në gusht, monumenti historik vijon të tërheqë mijëra turistë

Kalaja e Rozafës vijon të mbetet një nga destinacionet më të vizituara turistike në Shkodër. Vetëm gjatë muajit gusht, monumenti historik u vizitua nga 27 mijë e 143 persona.

Sipas të dhënave të publikuara nga Drejtoria Rajonale e Trashëgimisë Kulturore Shkodër, numri i vizitorëve gjatë gushtit shënoi një rritje prej 11% krahasuar me të njëjtin muaj të një viti më parë.

Fluksi i turistëve gjatë sezonit veror konfirmon interesin e vazhdueshëm për Kalanë e Rozafës, e cila, përveç historisë dhe trashëgimisë së saj, ofron edhe një panoramë të veçantë mbi Shkodrën dhe zonat përreth.

Rritja e vizitorëve gjatë muajit gusht përforcon rolin e këtij monumenti si një prej pikave kryesore të turizmit kulturor në Shkodër dhe në veri të vendit.