Teatri “Migjeni” në Shkodër ka nisur përgatitjet për shfaqjen e re të estradës, duke çelur njëkohësisht edhe sezonin e ri artistik. Nisja e provave u shoqërua me një konferencë për mediat, ku drejtuesit e teatrit, regjisori dhe aktorët prezantuan projektin e ri.
Fillimisht foli drejtori i Teatrit “Migjeni”, Gerti Palali, i cili theksoi se nisja e këtyre përgatitjeve shënon edhe rifillimin e aktivitetit artistik të institucionit për sezonin e ri.
Shfaqja do të vijë nën regjinë e Zehrudin Dokles, për të cilin ky produksion përbën një rikthim të veçantë pas shumë vitesh para publikut shkodran në rolin e regjisorit. Dokle prezantoi konceptin e shfaqjes dhe punën që pritet të zhvillohet me trupën gjatë periudhës së provave.
Produksioni i ri rikthen në vëmendje traditën e estradës shkodrane, një gjini e lidhur ndër vite me humorin, satirën dhe trajtimin artistik të fenomeneve të përditshmërisë.
Me nisjen e provave, Teatri “Migjeni” hap sezonin e ri artistik, ndërsa trupa do të vijojë punën për të sjellë para publikut shfaqjen e radhës.