Vllaznia ka zyrtarizuar një tjetër përforcim në prag të nisjes së sezonit të ri. Klubi shkodran ka njoftuar afrimin e portierit moldav Cristian Avram, i cili ka firmosur një kontratë dyvjeçare me kuqeblutë.
Avram vjen në Shkodër për të shtuar konkurrencën dhe sigurinë në repartin e portës, një nga pozicionet ku Vllaznia kërkonte përforcime gjatë merkatos së verës. Portieri moldav sjell me vete eksperiencën e krijuar gjatë karrierës së tij, ndërsa është aktivizuar edhe me Kombëtaren e Moldavisë.
“Portieri moldav, i aktivizuar edhe me Kombëtaren e Moldavisë, vjen për të përforcuar portën kuqeblu me eksperiencën dhe cilësitë e tij”, shkruan KF Vllaznia në njoftimin zyrtar.
Afrimi i Cristian Avram vjen vetëm pak ditë përpara startit të kampionatit, ndërsa kuqeblutë po plotësojnë organikën për sezonin 2026-2027. Vllaznia do ta nisë rrugëtimin në “Abissnet Superiore” më 21 gusht, në stadiumin “Loro Boriçi”, përballë Skënderbeut.
Me firmën e portierit moldav, stafi teknik i drejtuar nga Edi Martini siguron një alternativë të re për portën, ndërsa skuadra shkodrane vijon përgatitjet për sfidën e parë zyrtare të sezonit të ri.