Poezia e saj ka gjetur vend jo vetëm në vargje, por edhe në skenën muzikore shqiptare. Poetja dhe tekstshkruesja shkodrane Arjola Zadrima ka shënuar një tjetër sukses në krijimtarinë e saj. Kënga “Hajde mor i bukur”, me tekstin e saj dhe interpretimin e Fatbardha Nikçit, u vlerësua me çmimin e dytë dhe çmimin e orkestrës në edicionin e katërt të festivalit “Akordet e Kosovës”.
Për Arjola Zadrimën, poezia dhe muzika janë dy forma shprehjeje që ndërthuren në krijimtarinë e saj. Nga vargjet poetike te tekstet e këngëve, ajo synon të përcjellë emocione dhe mesazhe përmes fjalës së shkruar. E lidhur me traditën kulturore të Shkodrës, poetja ndalet edhe te sfidat e krijimtarisë dhe rëndësia që ka teksti në muzikën e sotme.
Suksesi në festivalin “Akordet e Kosovës” i shtohet rrugëtimit artistik të Arjola Zadrimës, duke sjellë një tjetër vlerësim për kontributin e saj si tekstshkruese. Përmes poezisë dhe muzikës, krijuesja shkodrane vijon të jetë pjesë e jetës artistike shqiptare.