Art House ka dalë me një deklaratë publike në mbështetje të protestave të zhvilluara gjatë muajve të fundit në Shqipëri, duke dënuar dhunën e ushtruar ndaj protestuesve dhe duke theksuar rëndësinë e angazhimit të kulturës në mbrojtje të vlerave demokratike.
Në reagimin e publikuar në rrjetet sociale, Art House akuzon pushtetin për përdorimin e dhunës shtypëse dhe të papranueshme, të cilën e cilëson në kundërshtim me parimet demokratike.
Duke iu referuar krijimit të Art House dhjetë vite më parë, përfaqësuesit e kësaj hapësire kulturore rikujtojnë se arti nuk duhet të shërbejë si zbukurim për pushtetin, por si një hapësirë ku zhvillohet mendimi kritik dhe marrin formë vizionet krijuese.
Art House shpreh mbështetjen për kërkesat e ngritura gjatë protestave, duke deklaruar se do të vijojë të qëndrojë në krah të studentëve, të rinjve dhe qytetarëve që kërkojnë një të ardhme të ndryshme, larg privilegjeve dhe interesave të një pakice.
“Nëse kultura ka një përgjegjësi në këtë moment, ajo është të qëndrojë në krah të atyre që kërkojnë ndryshimin, t’i dëgjojë dhe të vihet në shërbim të tyre”, thuhet në deklaratë.
Në përmbyllje, Art House thekson se do të vazhdojë të mbajë qëndrim si pjesë e shoqërisë civile, ndërsa në veprimtarinë e saj kulturore synon të nxisë dialogun, shkëmbimin e ideve dhe përfshirjen e zërave e këndvështrimeve të ndryshme.
Përmes këtij reagimi, Art House nënvizon se kultura duhet të ketë një rol aktiv në shoqëri, duke krijuar hapësira për mendimin e lirë dhe duke kontribuar në ndërtimin e një të ardhmeje që u përgjigjet nevojave të qytetarëve.
