Viti i ri akademik 2026–2027 në Universitetin e Shkodrës “Luigj Gurakuqi” do të nisë të hënën, më 5 tetor. Me këtë rast, universiteti ka përgatitur edhe “Javën e Mirëseardhjes 2026”, me një program aktivitetesh që do të zhvillohet gjatë gjithë javës.
Nga e hëna deri të premten, studentët e fakulteteve të ndryshme do të kenë takime me departamentet, sektorët e studentëve dhe ndërkombëtarizimit, sekretaritë mësimore, specialistët e IT-së dhe strukturat e sigurimit të cilësisë.
Në program janë përfshirë gjithashtu vizita në Bibliotekën e Universitetit, takime me përfaqësues të Bashkisë Shkodër, Këshillin Vendor Rinor dhe klubet studentore.
Aktivitetet do të zhvillohen në të gjashtë fakultetet e Universitetit “Luigj Gurakuqi”, me synimin që studentët, veçanërisht ata që ulen për herë të parë në auditorë, të njihen me strukturat, shërbimet dhe mundësitë që ofron universiteti.
Java e mirëseardhjes do të shoqërojë kështu ditët e para të vitit të ri akademik, duke krijuar kontaktin e parë të studentëve të rinj me jetën universitare në Shkodër.