Komedia e njohur “Këshilli i Ndrikullave”, një prej veprave që ka lënë gjurmë në historinë e humorit shkodran, pritet të rikthehet në skenën e Teatrit “Migjeni”, këtë herë në një variant modern.
Mjeshtri i humorit, aktori Sandër Ruçi, po punon për realizimin e shfaqjes, ndërsa detajet e para të projektit i bëri të ditura gjatë një konference për mediat në hollin e Teatrit “Migjeni”. Ruçi tregoi se synimi është që fryma e veprës së njohur të ruhet, por njëkohësisht ajo të komunikojë edhe me publikun e sotëm.
Në rolet e ndrikullave do të jenë edhe dy prej aktoreve të spikatura të skenës shqiptare, Rita Gjeka dhe Zamira Kita, të cilat do t’i japin jetë personazheve të kësaj komedie të njohur.
Një tjetër element i veçantë i shfaqjes do të jetë muzika. Ajo do të vijë përmes zërit të këngëtarit shkodran Frederik Ndoci, duke i shtuar projektit edhe një dimension muzikor.
“Këshilli i Ndrikullave” do të ndërthurë në skenë aktorë me përvojë dhe artistë të rinj, në një përpjekje për të bashkuar traditën e humorit shkodran me një qasje bashkëkohore.
Shfaqja pritet të vihet në skenë në fillim të vitit 2027, në kuadër të aktiviteteve kushtuar 100-vjetorit të lindjes së mjeshtrit të humorit shqiptar, Tano Banushi, duke sjellë kështu edhe një homazh për figurën dhe trashëgiminë e tij artistike.