Për të tretin vit radhazi, kampi veror “Buzëqeshim Verës” ka hapur dyert për fëmijët e Shkodrës, duke u ofruar një program të pasur me aktivitete edukative, lojëra dhe argëtim gjatë pushimeve verore.
Në kamp marrin pjesë fëmijët e qendrave komunitare, por edhe shumë bashkëmoshatarë të tjerë, të cilët çdo ditë bëhen pjesë e një ambienti gjithëpërfshirës ku zhvillojnë aftësitë e tyre, krijojnë miqësi të reja dhe kalojnë kohë cilësore përmes aktiviteteve sportive, kreative dhe edukative.
Organizatorët bëjnë të ditur se synimi kryesor i kampit është t’u ofrojë të gjithë fëmijëve mundësi të barabarta për t’u përfshirë në aktivitete që ndërthurin mësimin me argëtimin, duke i ndihmuar të zhvillojnë aftësi sociale, krijuese dhe bashkëpunuese.
Edicioni i tretë i kampit konfirmon interesin në rritje të familjeve dhe fëmijëve për këtë nismë verore, e cila tashmë është kthyer në një traditë të Bashkisë Shkodër. Përmes këtij programi, qindra fëmijë kanë mundësi të kalojnë pushimet në një mjedis të sigurt, edukativ dhe plot buzëqeshje, duke krijuar kujtime që do t’i shoqërojnë edhe në vitet e ardhshme.