Një lajm i rëndësishëm për Shkodrën dhe gjithë rajonin vjen nga UNESCO. Liqeni i Shkodrës është shpallur zyrtarisht Rezervë Biosfere, duke marrë një nga vlerësimet më të larta ndërkombëtare për mbrojtjen dhe promovimin e pasurive natyrore.

Lajmi është bërë publik nga kryetari i Bashkisë Shkodër, Benet Beci, i cili e cilësoi këtë si një moment krenarie për qytetin, komunitetet që jetojnë pranë liqenit dhe për potencialin që kjo zonë mbart për turizmin, ekonominë lokale dhe zhvillimin e qëndrueshëm.

Ky status i ri pritet të rrisë vëmendjen ndërkombëtare ndaj Liqenit të Shkodrës, i njohur për biodiversitetin e pasur, peizazhet e veçanta natyrore dhe rëndësinë historike e kulturore që ka për rajonin.

Përtej vlerave natyrore, Liqeni i Shkodrës konsiderohet një nga simbolet më të rëndësishme të identitetit shkodran, ndërsa shpallja si Rezervë Biosfere e UNESCO-s shihet si një mundësi e re për mbrojtjen dhe promovimin e tij në arenën ndërkombëtare.