Estrada e Shkodrës përbën një nga format më të njohura të artit skenik në Shqipëri, ku ndërthuren skeçe humoristike e satirike, muzikë dhe elementë pantomime. Kjo trupë u themelua më 6 qershor 1958 dhe pati si qendër Teatrin e Shkodrës, duke u shndërruar shumë shpejt në një institucion të rëndësishëm të kulturës qytetare.

Hapat e parë të kësaj gjinie në Shkodër ishin hedhur disa vite më herët. Në vitin 1954, regjisori Skanjeti solli në skenë numrin “Estrada në penxhere”, ndërsa më pas u prezantua edhe pjesa “U çua njeri e tha”. Dy vjet më vonë u shfaqën edhe pjesë të tjera të kësaj natyre, duke konsoliduar gradualisht formatin e estradës në qytet.

Në krijimin dhe zhvillimin e saj kontribuan edhe autorë të njohur si Tonin Miloti, Jonuz Dini, Ton Shoshi, Frano Gjelaj dhe Ludovik Pepa. Në skenë interpretuan fillimisht aktorë diletantë si Hasan Smaja, Tano Banushi dhe Paulin Preka, ndërsa më pas iu bashkuan edhe emra të njohur të teatrit profesionist, ndër ta Adem Kastrati, Tinka Kurti, Prekë Lëkunda, Lec Ndreka dhe Pistol Soja.

Trupa profesioniste e Estradës së Shkodrës e dha premierën e saj të parë më 14 nëntor 1958 me shfaqjen “Në pavionin e operacionit të zemrës”. Regjisori i parë ishte Paulin Sekuj, ndërsa drejtimin muzikor e mbante Mark Kaftalli dhe skenografinë e realizoi Lec Fishta.

Gjatë dekadave të aktivitetit të saj, kjo trupë ka realizuar mbi 230 premiera për publikun e rritur dhe për fëmijë. Në repertorin e saj përfshihen shumë pjesë humoristike që mbetën të njohura për publikun, si “Familja Bush”, “Fotografi”, “Kostandini dhe Doruntina”, “Beqoja në spital”, “Testamenti”, “Tri karriket”, “Lulashi” apo “Tuçi dhe Lokja”.

Në periudhën e viteve 1958–1990, humori i estradës shpesh reflektonte edhe kontekstin ideologjik të kohës, ndërsa në vitet e mëvonshme ai u bë më i lirë dhe më i larmishëm në trajtimin e temave shoqërore.

Një moment i rëndësishëm ishte viti 1969, kur në Festivalin e Parë të Estradave në Shqipëri, Estrada e Shkodrës u vlerësua me vendin e parë. Pas viteve ’90, trupa vazhdoi aktivitetin e saj duke sjellë edhe komedi të suksesshme, ndër të cilat spikat “Kunati i shokut Xhemal” e autorit Paulin Selimi. Më vonë, repertori u pasurua me komedi të tjera që u pritën mirë nga publiku.

Në këtë skenë kanë kontribuar shumë figura të njohura të humorit shqiptar si Tano Banushi, Zylha Miloti, Paulin Preka, Hasan Smaja, Ndoc Sheldija, Drita Tahiri, Gjosho Vasija, Katrina Biga, Zef Deda, Gëzim Kruja, Sandër Ruçi, Jolanda Shala, Drande Xhaj, Besnik Çinari, Edmond Halili dhe Anton Krosaj. Në drejtimin artistik spikasin regjisorët Paulin Sekuj dhe Edmond Mëhilli, karikaturisti Tefë Palushi ndërsa në muzikë dhe organizim kanë kontribuar Mark Kaftalli, Luan Barova, Nazmi Lishi dhe Ilir Zoga. Rolin e konferencierëve e kanë mbajtur ndër të tjera Hajrie Kola dhe Merita Smaja.

Përmes dekadave, Estrada e Shkodrës ka mbetur një nga shtyllat e humorit shqiptar, duke reflektuar jetën dhe karakterin e qytetit përmes satirës, muzikës dhe interpretimit skenik.