Shkodra ka nxjerrë ndër vite figura të rëndësishme të artit pamor, mes tyre edhe skulptorin Hashim Kruja, një nga emrat që lidhen ngushtë me zhvillimin e skulpturës monumentale në veri të vendit. I lindur në Shkodër në vitin 1937, ai është skulptori i parë në qytet me arsim të lartë në këtë degë.

Formimin artistik e nisi në Liceun Artistik “Jordan Misja”, në degën e skulpturës, të cilin e përfundoi në vitin 1959. Më pas, në vitin 1965, mbaroi Institutin e Lartë të Arteve në Tiranë. Diplomën e mbrojti me shtatoren “Luftëtari i veriut”, një vepër e vlerësuar për realizimin artistik dhe frymën kombëtare që përcillte.

Përveç krijimtarisë, Hashim Kruja dha kontribut të rëndësishëm edhe në arsim. Nga viti 1965 deri në 1975 punoi si mësues vizatimi në Shkollën Pedagogjike “Shejnaze Juka” në Shkodër. Më pas vijoi të japë mësim në shkolla të ndryshme të qytetit dhe, nga viti 1982 deri në 1992, ishte mësues i lëndës së skulpturës në Shkollën e Mesme Artistike “Prenkë Jakova”, duke ndikuar në formimin e brezave të rinj artistësh.

Krijimtaria e tij është e lidhur kryesisht me figura dhe ngjarje të rëndësishme të historisë kombëtare. Ndër veprat e tij përmenden “Partizani”, e derdhur në bronx dhe e vendosur në varrezat e dëshmorëve, si dhe disa vepra monumentale të realizuara në bashkëpunim, si “Monumenti i Malësisë së Madhe”, “Vasil Shanto”, “Lapidari i Lidhjes së Prizrenit” dhe “Lufta e Koplikut”.

Një pjesë e veprave të tij janë vendosur në ambiente publike dhe të gjelbëruara, si “Rozafa” (bronx) dhe “Teuta” (polimer). Ai ka qenë pjesëmarrës në ekspozita lokale dhe kombëtare, si dhe ka hapur disa ekspozita personale brenda dhe jashtë vendit, përfshirë Kosovën, Ulqinin dhe Zelandën e Re.

Sipas kritikës, Hashim Kruja përfaqëson një orientim kryesisht realist, me frymë kombëtare, duke vijuar traditat më të mira të mjeshtërve shqiptarë dhe të huaj. Veprat e tij mbeten pjesë e kujtesës urbane dhe historike, duke i dhënë formë konkrete figurave dhe momenteve të rëndësishme të identitetit shqiptar.