Një mbrëmje që do të mbahet mend gjatë në “Loro Boriçi”! Vllaznia triumfoi 2-1 ndaj AF Elbasanit në një përballje dramatike, duke siguruar tri pikë të arta dhe duke u shkëputur me pesë pikë nga ndjekësja më e afërt, Egnatia. Heroi i sfidës ishte Kevin Dodaj, i cili në minutën e pestë shtesë ndezi stadiumin me golin e fitores, të konfirmuar më pas edhe nga VAR.

Kuqeblutë kaluan në avantazh në minutën e 23-të me Bekim Balajn, që finalizoi saktë pas një aksioni të gjatë sulmues. Vllaznia pati edhe raste të tjera me Kastratin dhe Kallakun, ndërsa Elbasani rrezikoi me Boye, por Pohls u tregua vendimtar në portë. Pjesa e parë u mbyll 1-0 për vendasit.

Në fraksionin e dytë loja u bë më e ashpër dhe e luftuar. Vllaznia pretendoi për penallti pas një prekjeje me dorë në zonë, por loja vijoi. Tsague realizoi në minutën e 76-të, por goli u anulua për pozicion jashtë loje. Vetëm dy minuta më pas, Boye përfitoi nga një situatë e paqartë në zonë dhe barazoi shifrat në 1-1.

Kur gjithçka dukej se do të mbyllej në barazim, Dodaj shfrytëzoi një krosim në shtyllën e dytë dhe në 90+5’ çoi topin në rrjetë, duke shpërthyer festën në Shkodër. VAR-i konfirmoi golin mes dyshimeve për pozicion jashtë loje apo prekje me dorë, ndërsa Vllaznia festoi një sukses që mund të peshojë shumë në garën për titull.

Reagimet pas ndeshjes

Pas përfundimit të sfidës dramatike mes Vllaznisë dhe Elbasanit, që u mbyll me triumfin 2-1 të kuqebluve, trajnerët e dy skuadrave ndanë vlerësimet e tyre për 90-minutëshin në “Loro Boriçi”.

Tekniku i Vllaznisë, Edi Martini, u shpreh se skuadra e tij në disa momente lëshoi terren dhe i dha hapësira kundërshtarit, por theksoi se në fund ekipi tregoi karakter dhe arriti të marrë tri pikë shumë të rëndësishme në garën për kreun.

Nga ana tjetër, trajneri i Elbasanit, Gvozdenoviç, vlerësoi paraqitjen e ekipit të tij, duke deklaruar se skuadra zhvilloi një ndeshje të mirë dhe sipas tij meritonte të paktën një rezultat pozitiv nga kjo përballje.

Lojtari i ndeshjes u shpall Kevin Dodaj, autor i golit vendimtar në minutën e pestë shtesë, që i dhuroi fitoren Vllaznisë dhe ndezi festën në stadium.

Në fundin e takimit nuk munguan as momentet e tensionit mes stafeve të dy skuadrave dhe tifozërive, një klimë e reflektuar nga rezultati i ngushtë dhe rëndësia e pikëve në lojë. Megjithatë, gjithçka u mbyll me Vllazninë që festoi një tjetër hap të rëndësishëm drejt objektivave të sezonit.