Shkodra ka hyrë zyrtarisht në javën e Karnavaleve, një nga festat më të dashura të qytetit që daton prej vitit 1861.

Pavarësisht reshjeve të shiut, atmosfera festive nuk është ndalur, pasi fëmijët kanë pushtuar hollin e Bashkisë së Shkodrës të veshur me maska shumëngjyrëshe dhe kostume kreative.

Me buzëqeshje dhe entuziazëm, ata ndanë emocionet e tyre për këtë festë të veçantë, duke e kthyer ambientin e Bashkisë në një hapësirë plot gëzim dhe fantazi.

Po aq të përfshirë në këtë atmosferë festive janë shfaqur edhe animatorët, të cilët i përjetojnë me po aq ëmbëlsi Karnevalet.

Si pjesë e programit, festimet e Karnevaleve po vijojnë edhe gjatë ditës, me performanca artistike të kopshteve dhe shkollave të qytetit, duke i dhënë atmosferë rrugëve të Shkodrës.