Vllaznia ka siguruar kualifikimin në çerekfinalet e Kupës së Shqipërisë, pas fitores minimale 1-0 ndaj Pogradecit. Kuqeblutë e drejtuar nga trajneri Edi Martini arritën të zgjidhin ndeshjen në minutat e fundit, duke konfirmuar objektivin e radhës në këtë kompeticion.

Goli i vetëm i takimit u shënua nga Elmando Gjini, i cili në minutën e 84-t realizoi saktë me goditje me kokë, duke mposhtur portierin kundërshtar dhe duke i dhënë Vllaznisë biletën për fazën tjetër.

Ndeshja u shoqërua edhe me tensione, veçanërisht në minutat e fundit, por në fund ishte Vllaznia që festoi kalimin më tej. Për Pogradecin, eliminimi nga Kupa do të thotë tashmë fokus i plotë në Kategorinë e Parë, ku synimi mbetet arritja e objektivave sezonale.