Me hidhërim të thellë, komuniteti artistik i Shkodrës dhe më gjerë ka marrë lajmin e ndarjes nga jeta të aktorit dhe regjisorit të mirënjohur të Teatrit “Migjeni”, Edmond Mhilli.

Një figurë e respektuar e skenës shkodrane, Edmond Mhilli i kushtoi dekada të tëra artit teatror, duke kontribuar me pasion, përkushtim dhe profesionalizëm si në interpretim, ashtu edhe në regji. Rolet e tij të spikatura dhe puna krijuese e kanë bërë atë një emër të rëndësishëm në historinë e Teatrit “Migjeni”, duke lënë gjurmë të pashlyeshme në kujtesën artistike të disa brezave artdashësish.

Ndarja e tij nga jeta përbën një humbje të madhe jo vetëm për familjen dhe të afërmit, por edhe për komunitetin e artistëve dhe kulturën shqiptare në tërësi, e cila humb një prej zërave dhe figurave të saj më përfaqësuese në fushën e teatrit.

Homazhet në nderim të Edmond Mhillit do të zhvillohen më 10 janar, nga ora 09:00 deri në 12:00, në hollin e Teatrit “Migjeni” në Shkodër.