Drejtori i DRTK Shkodër, arkeologu Helidon Sokoli, ishte një nga të ftuarit e programit festiv “Simfoni Festash” në RTSH Shkodra, ku ndau me publikun një panoramë të gjerë mbi punën institucionale, trashëgiminë kulturore dhe sfidat që shoqërojnë mbrojtjen e saj në veriun e vendit.

Viti 2025 shënoi një rritje në detyrë për Helidon Sokolin në krye të Drejtorisë Rajonale të Trashëgimisë Kulturore Shkodër, një përgjegjësi që vjen në një moment zhvillimesh të rëndësishme për sektorin. Gjatë bisedës, ai theksoi se Kalaja e Rozafës ka njohur një rritje të ndjeshme të vizitorëve, duke numëruar rreth 170 mijë vizitorë gjatë këtij viti dhe duke thyer rekordet e mëparshme të vizitueshmërisë.

Sokoli bëri të ditur se viti 2026 pritet të shoqërohet me projekte të reja, veçanërisht në drejtim të përmirësimit të infrastrukturës, përfshirë çështjen e parkimit dhe lehtësimin e aksesit për vizitorët. Paralelisht, ai njoftoi se Shkodra do të ketë së shpejti një tjetër sit të rëndësishëm arkeologjik, atë të qytetëzës antike të Bushatit, e cila pritet të shpallet zyrtarisht zonë arkeologjike.

Një tjetër aspekt i rëndësishëm i diskutimit ishte sfida e burimeve njerëzore, të cilat sipas Sokolit mbeten të pamjaftueshme për të përballuar volumin e madh të punës dhe përgjegjësive që ka DRTK Shkodër. Ai apeloi gjithashtu për bashkëpunim nga ana e zotëruesve të banesave Monument Kulture, duke theksuar rëndësinë e hapjes së tyre për vizitorët si një vlerë e shtuar për turizmin kulturor.

Përtej rolit institucional, Helidon Sokoli ndau edhe pasionin e tij personal për udhëtimet me biçikletë, duke përmendur se një nga itineraret e fundit ka qenë drejt zonës së Hajmelit, një mënyrë për të njohur më nga afër territorin dhe trashëgiminë që ai administron.

Prezenca e Helidon Sokolit në “Simfoni Festash” solli për shikuesit një reflektim mbi rëndësinë e ruajtjes së trashëgimisë kulturore, përgjegjësinë institucionale dhe vizionin për ta kthyer Shkodrën në një pikë referimi gjithnjë e më të fortë të turizmit kulturor në Shqipëri.