Pas barazimit 2-2 në Rrogozhinë ndaj Egnatias, Vllaznia ndan tashmë kreun e tabelës me Elbasanin, duke konfirmuar sidoqoftë formën e mirë që po kalon në këtë edicion të “Abissnet Superiore”.

Ish-kapiteni i kuqebluve, Astrit Premçi, ka vlerësuar grupin aktual si skuadrën më të mirë të viteve të fundit, duke theksuar ekuilibrin mes përvojës dhe energjisë së re që po e bën Vllazninë pretendente serioze për titull.

Megjithatë, Premçi apelon për kujdes e vlerësim maksimal ndaj çdo kundërshtari, duke theksuar se ndeshja nuk mbyllet derisa të bjerë vërshëllima e fundit e arbitrit, një mesazh që ai e sheh të vlefshëm edhe për sfidën e radhës ndaj Dinamos.

Sfida Vllaznia–Dinamo do të luhet këtë të shtunë në stadiumin “Loro Boriçi”, duke nisur nga ora 17:00, një përballje që pritet të tërheqë vëmendjen e tifozëve kuqeblu dhe të përcaktojë ecurinë në garën për kreun.