Pas debateve publike të ditëve të fundit mbi zhvillimin e koncertit të këngëtarit të njohur Bujar Qamili në stadiumin “Loro Boriçi”, kryetari i Bashkisë Shkodër, Benet Beci, ka reaguar me një deklaratë zyrtare duke sqaruar vendimin për zhvendosjen e eventit.

Beci e cilëson “artificiale” dhe të nxitur nga “interesa personale” valën e reagimeve që kanë ngritur shqetësime mbi ndikimin që koncerti mund të ketë në gjendjen e stadiumit, përpara angazhimeve ndërkombëtare të Vllaznisë.

“Me stafin e bashkisë kemi bashkëpunuar me shumë dëshirë për të krijuar mundësinë e një koncerti të veçantë për një nga artistët më të rëndësishëm të këngës popullore shkodrane,” – shprehet Beci, duke theksuar se ishin marrë masa për të mos cënuar fushën sportive.

Megjithatë, për të shmangur çdo përplasje dhe për të mos krijuar ndasi në publik, kreu i bashkisë bën të ditur se koncerti do të zhvendoset në një hapësirë tjetër të rëndësishme për qytetin:

“Dua t’ju njoftoj se ne do ta zhvendosim koncertin në oborrin e përbashkët të të gjithë qytetarëve shkodranë, para Bashkisë Shkodër.”

Në fund të deklaratës, Beci uron suksese për Vllazninë në aventurën europiane dhe fton qytetarët të bëhen pjesë e koncertit në mbrëmjen e 21 qershorit, duke e cilësuar atë si një “ogur të mirë për ngjyrat kuqeblu, simbol i qytetit tonë.”

Kjo mbrëmje pritet të shënojë një festë të artit dhe harmonisë qytetare, me interpretimin e Mjeshtrit të Madh, Bujar Qamili.

Deklarata e plotë e kryebashkiakut Beci

Të nderuar bashkëqytetarë!
Këto ditë jemi të gjithë dëshmitarë të një debati artificial, e qartazi të nxitur nga interesa personale, lidhur me përdorimin e stadiumit "Loro Boriçi" në realizimin e koncertin e Mjeshtrit të Madh Bujar Qamili. 
Me stafin e bashkisë kemi bashkëpunuar me shumë dëshirë pêr të krijuar mundésinë e një koncerti tê vecantë, për njé nga artistët më të rendësishëm të këngës popullore shkodrane, dhuratë për gjithë artdashësit. Sigurisht duke pasur parasysh funksionin kryesor sportiv të stadiumit, organizimi i koncertit është menduar në mënyrë të tillë që të mos cënojë në asnjë mënyrë fushën, si dhe stadiumi të jetë në gjendje optimale për ndeshjet ndêrkombëtare të Vllaznisë.
Njëkohësisht, kuptoj se njê valë informacionesh të pavërteta rreth dëmit që mund t’i sjellë stadiumit organizimi i koncertit, ka shqetësuar jo pak tifozë të Vllaznisë.
Njerëzit shpesh e kanë të thjeshtë të përfshihen nga tymnaja që kërkon ta cojë vëmendjen në frikëra të panevojshme, kur s’ka mundësinë të përballet me ato reale. 
Koha është gjithmonë e duhura për të treguar cfarë është realisht problem e cilët janë qëllimet që nxisin palët në këto qëndrime kundërshtuese.
Por, si drejtues  i Bashkisë Shkodër,  nuk kam asnjë dëshirë që, edhe në mënyré të paqëllimshme, organizimet e institucionit që ju më keni dhënë privilegjin të drejtoj, të shfrytëzohen për të krijuar ndasi apo përballje artificiale. 
Me tagrin që më jep detyra, por mbi të gjitha me dëshirën e fortë që festa e dikujt të mos krijojë shqetësime te askush tjetër, dua t’ju njoftoj se ne do ta zhvendosim koncertin, në oborrin e përbashkët të të gjithë qytetarëve shkodranë, para Bashkisë Shkodër. Duke i uruar suksese Vllaznisë në aventurën europiane, ju ftoj të gjithëve të jemi pjesë e koncertit madhështor të këngëtarit Bujar Qamili,  në mbrëmjen e  21 qershorit.
Le të shërbejë ky koncert edhe si ogur i mirë për ngjyrat kuqeblu të Vllaznisë  simbol i qytetit tonë.
Jam i sigurt që do të jetë një mbrémje e paharrueshme!