Gëzim Kruja ishte një nga figurat më të ndritura të humorit shqiptar, një emër që mbetet i lidhur pazgjidhshmërisht me qytetin e Shkodrës ose kryeqytetin historik të humorit. I lindur në vitin 1939, ai erdhi në jetë në një familje me tradita të forta në fushën e humorit, ku gjyshi dhe babai kishin bërë emër si personazhe të ftuar në dasma dhe gëzime familjare për të sjellë atmosferë dhe hare.

Trashëgimia familjare u bë themeli mbi të cilin Gëzim Kruja ndërtoi një karrierë të jashtëzakonshme që zgjati mbi 55 vjet. Si aktor, autor, skenarist dhe regjisor i humorit, ai realizoi dhjetëra premiera recitale në Shkodër dhe Tiranë, përfshirë tri në Pallatin e Kongreseve. Mbi 1000 role në skenë, figura të shumta komike e satirike, mimikë e plastikë e përkryer dhe një talent i lindur për t’u transformuar në çdo karakter, këto janë vetëm disa nga arsyet pse publiku e adhuroi dhe e ndoqi gjithnjë me përkushtim.

Ai u shqua edhe si kloun cirku, kupletist, pantomimist dhe mjeshtër i improvizimit. Partneritetet e tij skenike me emra të mëdhenj të artit si: Tano Banushi, Zylia Miloti, Paulin Preka, Katrina Biga, Zef Deda, dhe shumë të tjerë, sollën shfaqje të paharrueshme në skenat shqiptare dhe ndërkombëtare. Kruja kontribuoi fuqishëm edhe në edukimin artistik të brezave të rinj, duke u bërë mentor për talente të reja si: Muhamet Çekini, Bujar Qamili, Bujar Ademovi e të tjerë.

Si autor, Gëzim Kruja shkroi 15 komedi që u vendosën në skenë me grupe të ndryshme artistike, ndër to: “Të kam në zemër”, “Pse s’martohe Zylfo”, “Puplat e fundit”, “Më fejoi baba”, “Pah ç’pension” e “Hyn fjalë ka dole”, të gjitha të mirëpritura nga publiku. Ai gjithashtu la një trashëgimi të pasur me mbi 250 skeçe, kuplete, monologë satirikë dhe skenare filmash humoristikë.

Veprat e tij letrare “Qesh e ngjesh”, “Ju afroj buzëqeshje” dhe “Keni nevojë me qeshë” përmbledhin në mënyrë brilante thelbin e humorit që ai përfaqësonte: të zgjuar, të mprehtë dhe gjithmonë me një mesazh të thellë shoqëror.

Për kontributin e tij të jashtëzakonshëm, Gëzim Kruja u nderua me tituj të shumtë: “Artist i Merituar” (1977), “Krenaria e Qytetit” (1999), “Naim Frashëri i Artë” (2004) dhe “Mjeshtër i Madh” (2010).

Humoristët si Gëzim Kruja nuk ishin thjeshtë artistë, por përfaqësues të vlerave identitare të qytetit të Shkodrës. Ata, përmes humorit të tyre fin, shpesh edhe kritik e denoncues, pasqyruan situatat historiko-politike të kohës, duke e mbajtur të gjallë shpirtin qytetar e intelektual të një qyteti që gjithmonë ka qenë pararojë në art e kulturë.

Gëzim Kruja ndërroi jetë më 5 prill 2020 në moshën 80-vjeçare, duke lënë pas një trashëgimi të jashtëzakonshme artistike që vazhdon të frymëzojë brezat e rinj dhe të nderohet nga publiku shkodran dhe më gjerë.

Ai mbetet një emër që nuk harrohet, jo vetëm për humorin që solli, por për dashurinë që dha ndaj qytetit të tij, për përkushtimin ndaj artit dhe për buzëqeshjet që vazhdojnë të jetojnë edhe sot në kujtesën e publikut.